БИТВА РУСЬКИХ КНЯ3ІВ I ПОЛОВЦІВ 3 ТАТАРО-МОНГОЛАМИ НА Р. КАЛЦІ
(1223 р.)
а) В лето 6731. По грехом по нашим, приидоша языци незнаемии, при великомь князи Киевьском Мстиславе Романовиче, внуце Ростиславле Мстиславича. Придоша бо неслыхании, безбожнии Моавитяне, рекомии Татарове, их же добре ясно никто же совесть, кто суть и откуду приидоша, и что язык их, и которого племени суть, и что вера их; зовут же я Татары, а инии глаголють Таурмены, а друзии Печенези, инии же глаголють, яко сии суть, о них же Мефодей, епископ Патаромский, сведетельствует, яко сии суть вышли из пустыня Етривьскиа, сущий межи востоком и севером, ко скончанию времени явитися им, их же загна Гедеон, и попленять всю землю от востока и до Ефранта и от Тигрь до Понтьского моря, кроме Ефиопия. Бог един весть их; но зде вписахом о них памяти ради князей Рускых и беды, яже Я суть имь от них. Про сих слышахом, яко многы страны поплениша: Ясы, Обезы и Касогы; приидоша же на землю Половетскую, и Половцемь ставшим, а Юрьи Кончаковичь бе болий всех Половець, и не може стати противу лицу их, но бегающу ему; а Половци не возмогше противитися им, побегоша, и мнози избиени быша, и гониша их до реки Днепра, а иных загнаша по Дону и в лукоморя, и тамо изомроша и убиваеми гневом божиим и пречистыа его матери. Много бо ти Половци зла створиша Руской земли; бог же отмщение створи над безбожными Куманы, сынми Измайловыми, победиша их Татари и инех язык. Приидоша всю страну Куманьску, и приидоша близь Руси, а Котяк Половецкий князь со инеми князи и со останком Половець прибегоша, идеже зовется вал Половетский, а Данил Кобяковичь, Юрьи Кончаковичь убиена быста, а инии мнози Половци прибегоша в Рускую оемлю. Сей же Котяк бысть тесть князю Мстиславу Мстиславичю Галичьскому, и прииде с поклоном с князи Половецкими к зятю Мстиславу, а Галичь, и ко всем княземь Рускым, дары принесе многы: кони, и вельбуды, буйволы, девкы, и одари все князи Рускиа глаголаша же к нимь сице: “нашю землю днесь одолели Татари, а ваша заутра возмуть пришед, то побороните нас; аще ли не поможете намь, то мы ныне иссечени будемь, а вы наутреи иссечени будете. И нача молитися Котяк затю своему о пособии, а Мстислав нача молитися братии своей, князем Рускым, река: “аще мы, братие, симь не поможемь, то предатися им же, да болши будет сила их”; и тако думавше много и яшася пособити Котяню, слушаще молениа Половецкых князей. Бывшу же совету всех князей во граде Киеве, сотвориша сице совет: “лучше бы нам срести их на чюжей земли, нежели на своей”, и начаша свои строити, кийждо свою власть. Тогда бе в Киеве князь Мстислав, сын Романов Ростиславича, а в Чрънигове Мстислав Святославичь Козельский, а в Галиче Мстислав Мстиславичь, ти бо бяху старейший в Руской земли, князя же великого Юрья Всеволодовича Суздальскаго в том совете не было; с ними же князи молодии: князь Данило Романовичь сын Мстиславича, князь Михаиле Всеволодовичь Чърниговьский внук Святослава Олговича, князь Всеволод сын Мстислава Киевьскаго, и инии князи мнози; тогда князь великий Половецкий крестися Басты, а Василка же не бе, в Володимери млад. И съвокупиша землю Руськую всю противу Татаром, и приидоша к реце Днепру на Заруб ко острову Варяжьскому. Уведаша же Татарове, яко идут князи Рустии противу имь, и послаша послы ко княземь Рускым, ркуще: “се слышим, оже противу нас идете, полушавше Половець, а мы вашей земли не заяхом, ни городов ваших, ни сел, ни на вас приидохомь; но приидохомь, богом попущени, на холопы наша и на конюси своя, на поганыа Половци, а вы возмите с нами мир, зане рати с вами нам нет; а аще побежать к вам Половци, и вы их (бейте от себе, а товар емлите себе, слышахомь бо яко много зла и вам творят, того деля мы их от себе бьемь”. Князи же Рустии того не послушаше, но и послы Татарьскиа избиша, а сами поидоша противу; и не дошедше Ошелья, сташа на Днепре. И послаша Татарове другыя послы, глаголюще: “аще есте послушали Половець и послы есте наши избили, а идете противу намь, то вы пойдете; а мы вас не замали ничем, а всем нам бог”; и отпустиша послы их. И прииде же ту вся земля Половецкаа и вси князи, а из Киева князь Мстислав со всею силою, а Володимер Рюриковичь со Смолняны, и вси князи Рустии, и вси князи Чръниговьстии, и Смолняне и инии страны. Тогда же князь Мстислав Галичьский перебродися Днепр в тысящи вой на сторожи Татарьские, и победи а, а останок их побеже с воеводою с Гемебяком, и ту имь не бе помощи; погребоша же воеводу своего Гомебяка живаго в землю, хотяще живаго ублюсти, и ту наидоша его; испросивше же Половци, убиша его. Слышавше же то князи Рустии, поидоша вси вкупе за Днепр на множество людий, а Галичане и Волынци кииждо со своими князи, а Куряне, и Трупчане и Путивльцы приидоша кииждо со своими князи; приидоша же и выгонци Галичьские в лодьях по Днестру, и выидоша в море, бе бо лодий 1000, и войдоша в реку Днепр, и возведоша пороги, и сташа у реки Хортици на броде на протолчьи; бе же с ними Домаречичь Юрье и Држикрай Володиславичь. Пришедши же вести во станы, яко пришли суть подсмотрити олядии Руския, слышавше Данил Романовичь, и всед на конь гна, и сущий конници и инии мнози князи с ним гнаша, видети рати; онем же шедшим, Юрьи же им сказаша, яко стрелци суть, пуще и Половець; инии же млъвяху, яко прости людие суть; Юрьи же Домаречичь млъвяше: “ратници суть и добраа воя”. И приехавше сказаша Мстиславу, Юрьи же все сказа, и рекшим молодым князем: “Мстиславе и другий Мстиславе! не стоите, пойдем противу им”. Преидоша же вси князи реку Днепр, и, поидоша на коних в поле Половецкое, и усретоша Татарове полкы Рускиа; стрелци же Русския победиша их и гнаша в поле далече, секуще их, и взяша скоты их, а со стады утекоша, яко всем воем наплънитися скота. Оттуда же идоша по них 8 дний до реки Калкы, и ту сретоша сторожеве Татарьстии, и удариша на пълци Рустии, сторожеве бе бишася с полкы Рускыми, и убиен бысть ту Иоан Дмитреевичь и ина два с ним; Татаромь же отъехавшим, и на прежереченней реце Калце усретоша Татарове Половецкия полкы и Руския. Князь же Мстислав Мстиславичь повеле пред перейти реку Калку Данилови с полкы и инем полком с нимь, а сам по них переиде; и зашедше за реку за Калку, и послаша во сторожех Яруна с полки и с Половци, а сами станом сташа ту, а князь Мстислав еха вборзе после. Видевшу же ему полки Татарьскиа, и приехав вооружитися повеле вборзе; а княземь Мстиславу и другому Мстилаву, седящим во стану, а не ведущим того, не поведа бо има Мстислав Мстиславичь зависти ради, бе бо котора межи има велика. Сшедшим же ся полком в место, Данил же выеха наперед, и Семен Олюевичь и Василко Гавриловичь, и разыдошася в полкы Татарьскиа. Василкови же сбодену бывшу, а Данилу бодену бывшу в перси, не чюяше же раны младеньства ради и буести, бывшей на телеси его; бе бо лет 18, но крепок бе на брань. Избивающу же ему Татары мужествене, видев же то Мстислав Немый, мнев яко Данило проболей бысть, и потечетъй на них; бе бо той мужь крепок, понеже ужика сы Роману, от племене Володимеря Манамаша: бе бо велику любовь имея ко отцю его, яко по смерьти своей власть свою дая князю Данилови. Татаром же бегающим, Данилови же избивающи их своим полком, и Олгови Курьскому крепко бьющуся с ними, тогда же Ярун и инии полци Половечьстии съступишася с ними, хотяще битися; пакы же воскоре побегоша Половци, и потопташа бежаще станы Рускых князь, а князи не успеша оплъчитися противу их, и смятошася вси полци Рустии, и бысть сеча зла и люта, грех ради наших Рускым полком побежденом бывшим. Данил же видев, яко крепчае брань Татарськаа належит, обрати конь свой и побеже от устремлениа противных, и вжада воды и пий, и почюти рану на телеси своем, во брани же не позна ея крепости ради мужества возраста своего; бе бо дърз и храбор, и не бе ни в чем же ему зарока. И бысть победа на вси князи Руские, ака же не бывала от начала Руской земли никогда же. Видев же се великий князь Киевьский бывшее зло, и не движеся никамо же с места; стал бе на горе над рекою Кадкою, бе бо место каменисто, и ту учиниша городок с копьем, и бися с ними из города по 3 дни. А инии Татарове поидоша после Рускых князей, бьюще их и до Днепра, а у города осташася два воеводы, Чегыркан и Тешукан, на князя Мстислава, и на зятя его на Андреа, на Александра Дубровьского; беста бо ту 2 князя со княземь Мстиславом. Ту же и Бродници быша старый, и воевода их Плоскиня, и ту окаанний даша роту ко князю Мстиславу и обема князема, яко не избити их, но пустити их на искуп, и солгав окаанний предасть их, связав, Татаром, а город взяша, людей же изсекоша, а князей подкладоша под дскы, и седоша връху их обедати, и тако ту скончаша князи живот свой. А инех князей гонячи до Днепра 6 убиша: князя Святослава Каневьского, Изяслава Ингворьского. Святослава Шумьскаго, Мстислава Чръниговьского со сыном, Юрья Несвежьскаго, а вой тблико 10-й прииде; и Александр Поповичь ту же убиен бысть со инеми 70-ю храбрых. Князь же Мстислав Мстиславичь тогда преже всех пребеже Днепрь и перевезся за нь, повеле ладии жещи, а иные сещи и отринути от брега, бояса по себе погони от Татар, а сам едва убеже от Татар в Галичь; а молодии князи прибежали в малелюдии, а князь Володимер Рюриковичь прибег в Киев, всед на стол. Си же сключися от Татар месяца июня 16, Татаром же победившим Рускиа князи, за прегрешение христианьское, и дошедшим им до Новагорода Святополчскаго, Русь же, не ведяху злобы и льсти Татарьские и ненависти на християн, исхождаху противу им со кресты, они же избиваху всех. Милостивый человеколюбець бог, ожидая покаянна христианьскаго, обрати Татар воспять от рекы Днепра на землю восточную, и повоеваша землю Таногутскую и ины страны; тогда же и Чаногиз н убиен бысть. Се же бысть нам за грехы наша, бог вложи доумение в нас, и погибе множества людий, и бысть вопль и аоздыхание и печаль по всем градом и по волостем; и глаголаху не сице, яко единех Киан изгибе тогда 10000. Егда же почаша князи съвокупляти полкы своя противу безбожных Татар, то да же и в Володимерь послашася ко князю Юрью Всеволодичю помощи просяще; он же посла к ним сыновца своего Василька Костянтиновича с Ростовци и с прочими вой. Василко же поидр вскоре, и не успе прийти к ним, но бывшу ему у Чрънигова и слыша зло, створившееся над Рускыми князи, и возвратися воспять, сохранен богомь и силою креста честнаго, и прииде во свой Ростов, славя бога и святую богородицю. Сих же злых Татар Таурмен не сведаемь откуду быша пришли на нас и камо ся дели опять. Того же лета ведро бе велми, мнози бо борове и болота загарахуся, и дымове силнии бяху, яко не далече бе видети человекомь: бе бо яко мгла к земли прилегла, яко и птицам по аеру не бе лзе летати, но падающе на землю умираху. Яви же ся звезда на западе тогда, от нея же бе луча не во зрак человекомь, но яко к полуденью, восхождаше же с вечера по заходе солнечнемь, и бе величеством паче инех звезд; и перебысть тако 7 дний и пакы явися луча та от нея к востоку, и такс пребысть 4 дний, и невидима бысть.
Історія України в документах і матеріалах.—Т. 1.—С. 154—157.